काव्यप्रकाश (आचार्य मम्मट - सम्पूर्ण १० उल्लास सटीक)

‘धुनोति चासिं तनुते च कीर्तिम्’ इत्यादेः ‘कृपाणपाणिश्च
भवान् रणक्षितौ ससाधुवादाश्च सुराः सुरालये’ इत्यादेश्च दर्शनात्
‘व्यधिकरणे’ इति ‘एकस्मिन् देशे’ इति च न वाच्यम् ॥११६॥
एकं क्रमेणानेकस्मिन् पर्यायः ॥
एकं वस्तु क्रमेणानेकस्मिन् भवति क्रियते वा स पर्यायः ।
क्रमेणोदाहरणम्—
नन्वाश्रयस्थितिरियं तव कालकूट
केनोत्तरोत्तरविशिष्टपदोपदिष्टा ।
प्रागर्णवस्य हृदये वृषलक्ष्मणोथ
कण्ठेऽधुना वससि वाचि पुनः खलानाम् ॥५१३॥