गदनिग्रह (आचार्य सोढल - कायचिकित्सा एवं रोग-विनिश्चय सटीक)

गदनिग्रहः । ५५
सन्निपातज्वरे जात्यादितैलम् ।
नवपत्राङ्कुरा जाती द्वे हरिद्रे शतावरी ।
जीवकर्षभकौ रास्ना सरलं देवदारु च ॥ २७१ ॥
मुस्तातालीशमञ्जिष्ठापाठावरुणचित्रकाः ।
कुञ्जं सर्पसुगन्धं च मधुकं द्वे च सारिवे ॥ २७२ ॥
अनन्ताऽऽमलकं मूर्वा मधुकं करवीरकम् ।
देवपुष्पं शिरीषस्य मूलं स्योनाकमेव च ॥ २७३ ॥
चव्यं लाक्षा पयसा च कल्कीकृत्याक्षसंमितान् ।
पक्त्वा चाथ कषायेण तैलप्रस्थं विपाचयेत् ॥ २७४ ॥
एतदभ्यञ्जनाद्धन्यात्सन्निपातात्मकं ज्वरम् ।
तैलं जात्यादिकं नाम वातपित्तकफापहम् ॥ २७५ ॥
ज्वरे षट्चरणं तैलम् ।
लाक्षाविश्वानिशामूर्वामञ्जिष्ठाखर्जिकामयैः ।
षड्गुणेन च तक्रेण सिद्धं तैलं ज्वरान्तकृत् ॥ २७६ ॥
शोषे शिरीषाद्यं तैलम् ।
मूलं त्वचं च पत्रं च प्रवालं स्कन्धमेव च ।
शिरीषाद्वितुले दद्याद्धर्मस्त्वेष प्रकीर्तितः ॥ २७७ ॥
वरुणः पारिभद्रश्च ककुभश्चतुरङ्गुलः ।
विल्वोऽग्निमन्थः श्योनाकः करघाटः सवञ्जुलः॥२७८॥
गन्धर्वहस्तः काकोली काश्मरी पाटली तथा ।
निदिग्धिकाऽथ वार्त्ताकी शालिपर्णी मयूरकः ॥२७९॥
तुरगी श्रेयसी चैव शतावर्युदकं तथा ।
सुषव्यतिबला चैव दन्ती सिंहमुखी तथा ॥ २८० ॥
पञ्चाशत्पलिकान् भागान्मूलं पुष्पं च रोहिषात् ।
निष्क्वाथ्यैस्त्रिफलायाश्च प्रस्थस्त्रिगुणितो भवेत् ॥ २८१ ॥
कोलकानां कुलत्थानां यवानां तत्समं तथा ।
द्राक्षायाः शतपुष्पायाः कुर्यादाढकमाढकम् ॥ २८२ ॥