षड्विंश ब्राह्मण (सामवेद का अद्भुत ब्राह्मण - दैव-उत्पात शान्ति विधान सटीक)

षड्विंशब्राह्मणम्

तस्य मूलं सत्वचम् अरत्निं निखनेत् ॥ १२ ॥
पित्रादिसंबन्धेन यूपं पुनः स्तौति—
तस्य यन्नैखान्यं तत्पितॄणाम् । यदूर्ध्वं तन्मनुष्याणाम्
यत्तदधो रशनाया ओषधिवनस्पतीनाम् । यदूर्ध्वं रशनायास्त-
द्विशेषां देवानाम् ॥ १३ ॥
तस्य यूपस्य यन्नैखान्यं निखनसंबन्धि स्थानं तत् पितॄणाम् आश्रयः ।
यदूर्ध्वं स्थानं तन्मनुष्याणाम् । रशनाया यूपे बद्धाया दर्भमय्या रज्ज्वा
अधो यत् स्थानं तत् ओषधिवनस्पतीनाम् । तदधिष्ठातृदेवानामित्यर्थः ।
रशनाया ऊर्ध्वं यत् स्थानं तद्विशेषां देवानाम् । आश्रय इत्यर्थः ॥ १३ ॥
धर्मान्तराणि दर्शयति—
आप्लावयन्त्यलंकुर्वन्त्यहतेन वसनेनाच्छादयन्ति
च ॥ १४ ॥
यूपम् आप्लावयन्ति अभिषिञ्चेयुः । तथा अलंकुर्वन्ति । किं च ।
अहतेन वसनेन वस्त्रेण आच्छादयन्ति आच्छादयेयुः ॥ १४ ॥
यथोक्तमाप्लावनादिकं प्रशंसति—
तद् गन्धर्वाप्सरसाम् ॥ १५ ॥
तदेतदाप्लावनादि गन्धर्वाणामप्सरसां चार्थे कृतं भवति ॥ १५ ॥
तदीयं चषालं तदूर्ध्वप्रदेशं च इन्द्रादिसंबन्धेन प्रशंसति—
इन्द्रस्य चषालम् । यदूर्ध्वं चषालस्याङ्गुलमात्रं कार्यं
तत्साध्यानां देवानाम् ॥ १६ ॥

---

1. J. अरत्निप्रमाणं for अरत्निं.
2. M1K. प्रस्तौति for स्तौति.
3. J. adds यन्० before निखन.
4. RMIK. om. ओषधिवनस्पतीनां.
5. J. आश्रयम् for आश्रयः.
6. JMK. ०प्लावनं for ०प्लावनादि.