प्रमाणवार्तिकम् (आचार्य धर्मकीर्ति - मनोरथनन्दि वृत्ति सहित बौद्ध न्याय महाग्रन्थ)

कलिकाताविश्वविद्यालयस्य संस्कृतविभागे
आशुतोषपीठस्य भूतपूर्वप्राध्यापकानाम्,
नवनालन्दामहाविहारस्याध्यक्षचराणां
डा० श्रीसातकारिमुकर्जीमहाभागानां
शुभाशंसनम्
नानाशास्त्रपारङ्गतो व्युत्पत्तिकाष्ठामधिरुह्य विद्वदग्रेसरः
स्वामी द्वारिकादासशास्त्रिमहाभागो भारतस्य प्राक्तनविद्यास्थान-
समुज्जीवनार्थं कृतसन्नाहः शास्त्ररसिकानां चेतस्यमन्दानन्दं
प्रादुर्भावयति । एष विद्वद्वरो माधवीयां धातुवृत्तिम्, न्यास-
पदमञ्जरीसमाह्वयं काशिकाव्याख्यानद्वयम्, कमलशीलकृतपञ्जिका-
समलङ्कृतं श्रीशान्तरक्षितविरचिततत्त्वसंग्रहं च आधुनिकीं विद्वत्-
समादृतां शैलीमवलम्ब्य सम्पाद्य प्राचकासत् । एतानि सर्वाण्येव
ग्रन्थरत्नानि अलभ्यान्यासन् । एतेषां ग्रन्थरत्नानां पाठनिर्णया-
दिकमभूतपूर्वं समाचरन्नयं विपश्चित् पाण्डित्यस्य वैदग्ध्यस्य च
गरिमाणमाविष्कुर्वन्न केवलं मम, अपि तु समेषां शास्त्रानुरागिणां
हृदि सन्तोषं तनोतीति विवृण्वतो मे महान् हर्षः सञ्जायते ।
प्रेक्षावानध्येता अस्य विद्वत्प्रकाण्डस्य भाषापरिज्ञानं सूक्ष्मयुक्तीना-
मवगाहनं च समीक्षमाणो विस्मेरतामाविष्कुर्वीत । एतेषां ग्रन्थ-
रत्नानां दुर्बोधा भाषा, दुरधिगमं च तर्कजालं श्रमभीरूणामापात-
ज्ञानतुष्टानां छात्राणां च विभीषिकामुदपादयत् । एतेषां प्रति-
संस्कर्ता अयमाचार्यद्वारिकादासशास्त्रिमहोदयोऽस्माकमविनश्वर-
कृतज्ञतामधिकरिष्यति ।
अधुनायं धर्मकीर्त्तिप्रणीतप्रमाणवार्त्तिकस्य मनोरथनन्दिकृत-
वृत्तिसहितस्य पुनः संस्करणं सम्पाद्य प्रकाशने व्याप्रीयते ।
मनोरथनन्दिकृता चेयं वृत्तिः समग्रस्य प्रमाणवार्त्तिकस्य व्याख्यान-
भूता एकैव ग्रन्थस्यास्य समग्रस्य सुगमतया तात्पर्यज्ञाने हस्ता-
लम्बं वितरति । इयं च वृत्तिर्ग्रन्थतो नातिगौरवं नातिलाघवं वा
वा संश्रयते । स्वर्गतपण्डितवरराहुलसांकृत्यायनेनास्याः प्रथमं
संस्करणं सम्पादि । इदम्प्रथमतया, सामग्रीदारिद्र्येण च त्रुटि-
विहीनं तन्नाभूत् । स्वामिद्वारिकादासशास्त्री एतेषामादीनवानां