मूलमध्यमककारिका (आचार्य नागार्जुन - चन्द्रकीर्ति प्रणीत प्रसन्नपदा व्याख्या सहित)

१०
अग्नीन्धनपरीक्षा दशमं प्रकरणम् ।
अत्राह — यदिदमुक्तं तस्मात्कर्मकारकवदेव उपादानोपादात्रोरपि न स्वाभाविकी सिद्धिरिति,
तदयुक्तम्, सापेक्षाणामपि पदार्थानां स्वभावभावदर्शनात् । तथा हि अग्निरिन्धनमपेक्ष्य भवति ।
न च निःस्वभावोऽग्निः, तस्य औष्ण्यदाहकत्वादिखभावकार्योपलब्भात् । एवमग्निमपेक्ष्य इन्धनं
भवति । न च तन्निःस्वभावम्, बाह्यमहाभूतचतुष्टयस्वभावत्वात् । एवमुपादानसापेक्षोऽप्युपादाता
स्वभावतो भविष्यति, उपादातृसापेक्षं चोपादानमित्यग्नीन्धनवदेतौ भविष्यत उपादानोपादाताराविति ।
उच्यते । स्यादेतदेवम्, यदि अग्नीन्धने एव स्याताम्, न तु स्तः । कथम् ? इह यदि अग्नीन्धने
स्याताम्, नियतं ते एकत्वेन वा स्यातामन्यत्वेन वा ? उभयथा तु न युज्यत इत्याह—
यदिन्धनं स चेदग्निरेकत्वं कर्तृकर्मणोः ।