सन्त दादू दयाल वाणी (सन्त दादू दयाल जी - सम्पूर्ण साखी एवं पद सटीक)

श्री दादूवाणी-राग मारू 7

157. चौताल
     आदि काल अंत काल, मध्य काल भाई।
     जन्म काल जुरा काल, काल संग सदाई ॥ टेक ॥
     जागत काल सोवत काल, काल झंपै आई।
     काल चलत काल फिरत, कबहूँ ले जाई ॥ 1 ॥
     आवत काल जावत काल, काल कठिन खाई।
     लेत काल देत काल, काल ग्रसै धाई ॥ 2 ॥
     कहत काल सुनत काल, करत काल सगाई।
     काम काल क्रोध काल, काल जाल छाई ॥ 3 ॥
     काल आगै काल पीछैं, काल संग समाई।
     काल रहित राम गहित, दादू ल्यौ लाई ॥ 4 ॥
158. हित उपदेश । त्रिताल
     तो को केता कह्या मन मेरे ।
     क्षण इक मांही जाइ अनेरे, प्राण उधारी ले रे ॥ टेक ॥
     आगे है मन खरी विमासणि, लेखा मांगै दे रे।
     काहे सोवे नींद भरी रे, कृत विचारे तेरे ॥ 1 ॥
     ते परि कीजे मन विचारे, राखै चरणहु नेरे।
     रती इक जीवन मोहि न सूझै, दादू चेत सवेरे ॥ 2 ॥
159. (गुजराती) । त्रिताल
     मन वाहला रे, कछू विचारी खेल, पड़सी रे गढ़ भेल ॥ टेक ॥
     बहु भाँति दुख देइगा वाहला, ज्यों तिल माँ लीजे तेल।
     करणी ताहरी सोधसी रे, होसी रे सिर हेल ॥ 1 ॥
     अब ही तैं कर लीजिये रे वाहला, सांई सेती मेल।
     दादू संग न छाड़ि पीव का, पाई है गुण की बेल ॥ 2 ॥

• 368 -