भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 168, कुल 423 में से
संदर्भ में पढ़ेंपृष्ठ 168
- १५४ -
जानक्या सहितोऽवात्सीत्तत्रैव निशि नायकः ।
ततो रात्रौ प्रजातायां पारिजातसुगन्धिना ॥ ४१ ॥
वीजितः पवनेनासौ मल्लीकुसुमसंगिना ।
एकाकी विचरन् पूर्णचन्द्रज्योत्स्नाप्रकाशिते ॥ ४२ ॥
सरय्वाः पुलिने रामः स्त्रियमेकां ददर्श सः ।
नवीनयौवनोल्लासमण्डितावयवश्रियम् ॥ ४३ ॥
श्रियं यथा विस्फुरन्ती चञ्चलानां छटामिव ।
कुर्वन्तीं देहदीप्तीनां वृन्दैर्वितिमिरा दिशः ॥ ४४ ॥
अङ्गरागातिसौरभ्यसम्भारसुरभीकृते ।
कानने विस्फुरन्तीं च स्वाभाविकतनुत्विषा ॥ ४५ ॥
पल्लवारक्त चरणां रम्भोरुं हंसगामिनीम् ।
रक्तांशुकपरीधानां संध्यापूर्णातिथेरिव ॥ ४६ ॥
निम्ननाभिसरोरम्यं त्रिवलीललितोदरम् ।
रोमराजीसमुल्लासिमध्यां मध्यां च सुन्दरीम् ॥ ४७ ॥
उत्तुङ्गस्तनकुम्भाक्तकाश्मीरागुरुसौरभाम् ।
मुक्ताहारलतारत्नमालासंशोभितोरसम् ॥ ४८ ॥
ग्रैवेयकमहारत्नदीधितिद्योतिकाननाम् ।
मन्दस्मितमनोहारिमुखचन्द्रोत्थचन्द्रिकाम् ॥ ४९ ॥
चारुनासां चकोराक्षीं कपोलादर्शभासुराम् ।
रत्नताटकसम्पन्नश्रवणद्वयमञ्जुलाम् ॥ ५० ॥
विशालभालफलकभूतसौभाग्यभासिनीम् ।
सीमन्तरत्नपदान्तर्गुप्तसिन्दूररेखिकाम् ॥ ५१ ॥
श्यामां रजनिसंशोभिवेणीमौक्तिकतारकाम् ।
सर्वाभरणसम्पन्नां सर्वसौन्दर्यसंयुताम् ॥ ५२ ॥
सर्वसौभाग्यभवनां सर्वत्रैलोक्यमोहिनीम् ।
जाम्बूनदमयीं मालां दधानां करपङ्कजे ॥ ५३ ॥
वरणार्थं प्रियस्यास्य बहलोत्कलिकाकुलाम् ।
तां दृष्ट्वा रघुशार्दूलः प्रोवाच वचनं ततः ॥ ५४ ॥
कासि त्वं विपुलश्रोणि चरन्ती निर्जने वने ।
नारी वा किंनरी वापि देवी वा वनदेवता ।
नागी वा नागकन्या वा धन्या सौभाग्यसंयुता ॥ ५५ ॥