षड्विंश ब्राह्मण (सामवेद का अद्भुत ब्राह्मण - दैव-उत्पात शान्ति विधान सटीक)

पञ्चमः खण्डः
अथ सविशेषां संध्यां प्रश्नपूर्वकमाख्यायिकया निरूपयितुं ब्रह्मवादिनां
प्रश्नं तावदुपस्थापयति—
ब्रह्मवादिनो वदन्ति । कस्माद् ब्राह्मणः सायमासीनः
संध्यामुपास्ते ? कस्मात् प्रातस्तिष्ठन् ? का च संध्या ? कश्च
संध्यायाः कालः ? किं च संध्यायाः संध्यात्वम् ? ॥ १ ॥
अर्थस्त्वतिरोहित एव ॥ १ ॥
उत्तरं वक्तुमुपक्रमते—
देवाश्चासुराश्चास्पर्धन्त । तेऽसुरा आदित्यमभिद्रवन् ।
स आदित्यो बिभेत् । तस्य हृदयं कूर्मरूपेणातिष्ठत् ॥ २ ॥
पुरा देवाश्चासुराश्च परस्परम् अस्पर्धन्त । तत्र ते देवैः सह
स्पर्धमाना असुराः दानवाः आदित्यम् अभिलक्ष्य योद्धुम् अभिद्रवन् ।
तदानीं स आदित्यः तेभ्योऽसुरेभ्यः बिभेत् । अतस्तस्य आदित्यस्य हृदयं
कूर्मरूपेण संकुच्यातिष्ठत् इति ॥ २ ॥
ततः किमित्यत्राह—
स प्रजापतिमुपाधावत् । तस्य प्रजापतिरेतद् भेषज-
मपश्यत् । ऋतं च सत्यं च ब्रह्म चोंकारं च त्रिपदां च
गायत्रीं ब्रह्मणो मुखमपश्यत् ॥ ३ ॥

---

4. MK. ब्रह्मणः for ब्राह्मणः.
5. J om. परस्परम् .
6. J. अभ्यद्रवन् for अभिद्रवन्.
7. MIK. (अ) सुरेभ्योऽबिभेत् for असुरेभ्यः बिभेत् .
8. RI. संकोच्यादितिष्ठदिति, M. संकुर्यात् अतिष्ठत् तिष्ठति स्म, K.
   संकुर्यात्तिष्ठति for संकुच्यातिष्ठत् .