भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 292, कुल 423 में से
संदर्भ में पढ़ेंपृष्ठ 292
- २७९ -
कोटिरुद्रभुजं कोटिवसिष्ठादिविनाशकम् ।
कोटिदेवेन्द्रविलयं कोटिदेवभवं तथा ॥ २७ ॥
आधिदैविकमध्यात्ममाधिभौतिकमेव च ।
अक्षरं त्रिगुणातीतं त्रिभवं त्रिभवातिगम् ॥ २८ ॥
त्रिविष्टपेशसम्पूज्यं ब्रह्मरुद्रादिभीषणम् ।
एवंविधं प्रभुं रामं दृष्ट्वा कालो व्यकम्पत ॥ २९ ॥
न्यमीलयद् दृशौ भीत्या द्रष्टुं नाशकदीश्वरम् ।
स्थातुं च नाशकत् स्थानेऽपलायत दिशो दश ॥ ३० ॥
नतः सौम्यतरो भूत्वा कथंचित्पुनराययौ ।
धैर्यं बद्ध्वा दृढं धीरो निदेशं ब्रह्मणः स्मरन् ॥ ३१ ॥
स्फुटीचकार सहजानात्मनः सकलान् गुणान् ।
सिषेच पुरवीथींश्च शीतलैश्चन्दनोदकैः ॥ ३२ ॥
प्रफुल्लकुमुदाम्भोजमकाण्डमभवत्सरः ।
अकाले चाग्निहोत्राणि हव्यगन्धानि जज्वलुः ॥ ३३ ॥
ववुर्वाताः सुखस्पर्शाः सुनक्षत्रमभून्नभः ।
ऋतुराजः प्रादुरासीत्प्रोत्फुल्लकुमुदाकरः ॥ ३४ ॥
केकीशुकपिकध्वानचकोरीध्वनिमञ्जुलः ।
श्रियमाकालिकीं वीक्ष्य मेने कालकृतं विभुः ॥ ३५ ॥
अद्य कालः समायास्यन् कुरुते मे प्ररोचनम् ।
फलस्तावितदेहे च कर्मकाण्डेऽतिदुष्करे ॥ ३६ ॥
ततः पार्श्वस्थितं शेषं लक्ष्मणं लोकमङ्गलम् ।
प्रतिहारपदं दत्त्वा स्थापयद् द्वारि राघवः ॥ ३७ ॥
तत एकान्तगं दूरे रामं भुवनभूषणम् ।
आजगाम स्वयं कालः कालकालं कृपानिधिम् ॥ ३७ ॥
अतिसौम्यं वपुः कृत्वा कोटिचन्द्रसुशीतलम् ।
सुवेशं सुमुखं स्वक्षं सुरूपं सुन्दरोत्तमम् ॥ ३९ ॥
सोऽपश्यन्मणिपीठस्थं रामचन्द्रं जगद्धितम् ।
प्रावृषेण्यघनश्यामं सुधावर्षिणमद्भुतम् ॥ ४० ॥
फुल्लेन्दीवरसंकाशं मनोज्ञकरणेक्षणम् ।
कोटिकन्दर्पलावण्यं कौस्तुभोद्भासितं गले ॥ ४१ ॥
पादाङ्गुलिनखद्योतपराभूतेन्दुमण्डलम् ।
शृङ्गारमिव मूर्त्याढ्यं प्रेमाणमिव भासुरम् ॥ ४२ ॥