भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 177, कुल 423 में से
संदर्भ में पढ़ेंपृष्ठ 177
- १६३ -
रसभावमये सौधे दूतीसख्यावलीवृता।
रसस्यैष परः पन्था नात्र कार्या विचारणा ॥ ५५ ॥
विचारतः पतेदाशु प्रभोर्द्वेषी भवेच्च सः।
न हीदृशे महाभावे कस्याप्यनाधिकारिता ॥ ५६ ॥
अनेकभवसंशुद्धवीतकल्मषमानसः ।
कोटिष्वपि मनुष्याणां भावकः स्यादसंशयः ॥ ५७ ॥
तस्यैषा चिन्मयी लीला सहजानन्दिनीशितुः ।
भावनापथमभ्येत्य भवदुःखं विनाशयेत् ॥ ५८ ॥
कामानुग्राहिका लीला निष्कामं कुरुते जनम् ।
जन्मान्तरसहस्रेण शुद्धे भक्तिपथे स्थितम् ॥ ५९ ॥
इति श्रीमदादिरामायणे ब्रह्मभुशुण्डसंवादे पश्चिमखण्डे भरतलक्ष्मणीये
श्रीशुकजनकोपगीतसीताजन्मोपाख्याने एकपञ्चाशत्तमोऽध्यायः ॥ ५१ ॥
✤
द्विपञ्चाशत्तमोऽध्यायः
श्रीशुक उवाच
यद्धि मायामयं विश्वं तदर्वाक् सम्प्रतिष्ठितम् ।
नित्यं चिदानन्दमयं सरयूतीरभूमिगम् ॥ १ ॥
अरूपवच्च तत्सर्वं ज्ञानिनामप्यगोचरम् ।
तथापि खलु भक्तानां दृश्यते रूपसुन्दरम् ॥ २ ॥
तेजोमयं रसमयं भक्तिप्रेमोपबृंहितम् ।
इच्छया रामचन्द्रस्य परस्य ब्रह्मणः खलु ॥ ३ ॥
सर्वे तन्मयता याता नामधामवपुर्गुणाः ।
लीलादिकं तत्र विश्वं परं ब्रह्मैव केवलम् ॥ ४ ॥
एतद्धि सहजानन्दामनोरथस्य पूर्तये ।
आदावेव स्वयं रामो रमते वै प्रमुद्वने ॥ ५ ॥
यत्र कल्पद्रुमारामवेष्टितं पुरमुत्तमम् ।
अयोध्याख्यं परं स्थानं रत्नप्रासाददीपितम् ॥ ६ ॥