भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)

अवाद्यन्देववाद्यानि यथा पुत्र्यास्तव प्रभो।
तथा पुत्रस्यजनने काकुत्स्थस्यापि भूरिशः॥ ४२ ॥
स तस्त तनयो राजन् साक्षाद्देवो रमापतिः।
इयं ते तनया चापि साक्षाच्छ्रीसहजाभिधा॥ ४३ ॥
अनयोः संततं योगः क्रीडासुन्दररूपयोः।
भविता त्वद्गृहे राजन् महता सम्भ्रमेण सः॥ ४४ ॥
इति श्रीमदादिरामायणे ब्रह्मभुशुण्डसंवादे पश्चिमखण्डे सीताजन्मोत्सवे
श्रीशुकजनकसंवादे पञ्चाशत्तमोऽध्यायः॥ ५० ॥

एकपञ्चाशत्तमोऽध्यायः

श्रीशुक उवाच
अथानयोरहं वक्ष्ये तत्त्वं लोकोत्तरं तु यत्।
चिदानन्दैकवपुषोः जानकीरघुनाथयोः॥ १॥
चिद्रूपा जानकी देवी परानन्दः स राघवः।
अनया वीक्षितः सद्यश्चेतन्यायैव कल्पते॥ २॥
पुरा तत्त्वानि सृष्ट्यादौ ब्रह्माण्डारम्भहेतवे।
वीर्याधानार्थमेनं हि तुष्टुवुर्ब्रह्मरूपिणम्॥ ३॥
तत्त्वान्यूचु
नमोऽस्तु ब्रह्मणे तस्मै पूर्णाय परमात्मने।
निजानन्दप्रकाशाय साक्षिणेऽध्यक्षमूर्तये॥ ४॥
वदन्ति यत्तत्त्वविदः परं तत्त्वं सनातनम्।
तस्मै वेदशिरोरूढवर्ष्मणे ब्रह्मणे नमः॥ ५॥
समासव्यासरूपेण सर्वोपनिषदां गिरः।
समन्वयन्ति यत्रैव तस्मै कस्मैचिदो नमः॥ ६॥
अव्यक्ताय निरीहाय निर्गुणाय परात्मने।
निराभासाय शुद्धाय परस्मै ब्रह्मणे नमः॥ ७॥
समस्ततत्त्वबीजाय तत्त्वातीताय साक्षिणे।
सर्वाध्यक्षस्वरूपाय तस्मै ते ब्रह्मणे नमः॥ ८॥