भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 126, कुल 423 में से
संदर्भ में पढ़ेंपृष्ठ 126
- ११२ -
त्वं रामगङ्गा भवमुक्तिहेतुः समस्तकल्याणपरं परात्मा।
शुभाय लोके प्रकटत्वमागाः श्रीरामभक्त्येकजुषां जनानाम् ॥ ३२ ॥
नमोऽम्ब रामगङ्गायै तुभ्यं कल्याणमूर्तये।
वासिष्ठ्यै प्रेमगङ्गायै पावयन्त्यै जगत्त्रयम् ॥ ३३ ॥
इति स्तुवन्तो मुनयः सरयूं विश्वपावनीम्।
मुक्ता अपि जना जाताः प्रेमभाजोरघूद्वहे ॥ ३४ ॥
ततः सा स्वर्गभूमिषु तत्रस्थैर्विहितस्तवा।
प्लावयन्ती शुभान् स्वर्गान् क्रमेणागाद्धिमालयम् ॥ ३५ ॥
हिमाद्रेः पूर्वशिखरे संस्थिता शुभ्ररूपिणी।
स्तूयमाना देवसंघैर्यक्षगन्धर्वपुङ्गवैः ॥ ३६ ॥
इति श्रीमदादिरामायणे ब्रह्मभुशुण्डसंवादे पश्चिमखण्डे सीताजन्मोत्सवे
सरयूसम्भवे एकोनचत्वारिंशोऽध्यायः ॥ ३९ ॥
चत्वारिंशोऽध्यायः
श्रीशुक उवाच
ततो वसिष्ठो योगीन्द्रस्तपश्चक्रे पुरा महत्।
तपसा तेन संतुष्टा सरयूरागता महीम् ॥ १ ॥
जनक उवाच
कथं मुनिस्तपश्चक्रे वसिष्ठः सरयूकृते।
एतन्मे वद योगीन्द्र रामगङ्गा यथाऽऽगता ॥ २ ॥
श्रीशुक उवाच
शृणु राजन् प्रवक्ष्यामि सरयूत्पत्तिमुत्तमाम्।
अयोध्यायाश्च निर्माणं पूर्वं वेवस्वतान्मनोः ॥ ३ ॥
वक्ष्ये प्रसंगतः प्राप्तां वैवस्वतमनोः कथाम्।
पावनीं श्रवणादेव चित्तशुद्धिविधायिनीम् ॥ ४ ॥
वैवस्वतो मनुरभूद् भगवान् सर्वदर्शनः।
मनीषी चैव सर्वज्ञः प्रजाकर्मण्यतन्द्रितः ॥ ५ ॥
पारगः सर्ववेदानां सर्वदैवतपूजितः।
आज्ञया ब्रह्मणो नित्यं भुवमेतां शशास सः ॥ ६ ॥