भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 93, कुल 423 में से
संदर्भ में पढ़ेंपृष्ठ 93
- ७९ -
तां पूर्वोक्तप्रकारेण राजा समुपलभ्य तु ।
अनिनाय गृहे स्वस्य महिष्यै तां समर्पयितुम् ॥ ३१ ॥
ततः सम्पश्यतां तेषां देवगन्धर्वरक्षसाम् ।
मनुष्याणां मुनीनां च बभूवातीव कौतुकम् ॥ ३२ ॥
पूर्वं जाता तु सा तस्यां सद्य एव व्यलीयत ।
सा चासीदद्य संजाता शिशुरूपा मनोहरा ॥ ३३ ॥
एतच्चरित्रमतुलं निरीक्ष्य जनको नृपः ।
अतीव विस्मयाविष्टो बभूव सुमहामतिः ॥ ३४ ॥
जनक उवाच
किमिदं खलु संजातं दैवतं चरितं महत् ।
उभे अपि परे दृष्टे रूपसारविभूषिते ॥ ३५ ॥
अन्यूनानतिरिक्तश्रीसम्भावितवपुर्लते ।
एका विवेश चैतस्यां साप्येषा समभूच्छिशुः ॥ ३६ ॥
अहो अत्यद्भुतं दृष्ट्वा मनो मे विस्मयाकुलम् ।
चिरं समाधिनाप्येनामहं ज्ञातुं न पारये ॥ ३७ ॥
इति श्रीमदादिरामायणे ब्रह्मभुशुण्डसंवादे पश्चिमखण्डे भरतलक्ष्मणीये
सीताजन्मोत्सवे ऽष्टाविंशोऽध्यायः ॥ २८ ॥
एकोनत्रिंशोऽध्यायः
लक्ष्मण उवाच
एवं चिन्तयतस्तस्य मुनीन्द्रः समुपागतः ।
शुकः सर्वार्थतत्त्वज्ञो वैयासकिरुदारधीः ॥ १ ॥
तमपृच्छत्ततो राजा तद्देवचरितं स्मरन् ।
प्रजातामनुजातायां लीनां तस्याश्च शैशवम् ।
स्मारं स्मारं बभूवासौ विमूढ इव योगवित् ॥ २ ॥
राजोवाच
जाता मे परमा कन्या देवतात्मा कलानिधिः ।
तस्याः प्रकाशमात्रेण निस्तमस्कमभूज्जगत् ॥ ३ ॥