भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 36, कुल 423 में से
संदर्भ में पढ़ेंपृष्ठ 36
- २२ -
एतत्स्वरूपायोग्यं ते तन्वि तीव्रतरं तपः।
यस्य प्रिया त्वं भविता तस्य श्रीर्भविता गृहे ॥ ३५ ॥
अहं मुनिरुदासीनस्तपसा तेऽस्मि चालितः।
इति श्रुत्वा वटोर्वाक्यमहमुक्तवती वचः ॥ ३६ ॥
नाहमिन्द्रादिपदवीं न वा तन्महिषीपदम्।
कामये किंतु गोविन्दचरणाब्जरजो भृशम् ॥ ३७ ॥
ब्रह्मादिभिः सहेशानैर्देवैरपि सुदुर्लभम्।
ततो मां स वटुः प्राह प्रहसन् रम्यया गिरा ॥ ३८ ॥
वटुरुवाच
हंत ते हृदयं तन्वि स्वाराज्यसुखभागिनाम्।
महिषीत्वमनादृत्य विष्णुं कामयते कथम् ॥ ३९ ॥
स्त्रीणां हि स्वपतिर्विष्णुर्येन पाणिग्रहो भवेत्।
लब्ध्वा तं सर्वतः शुद्धं किं कार्यं विष्णुना स्त्रियः ॥ ४० ॥
एकान्तचारी विषयैर्वियुक्तो विरक्तचित्तो यतिभिः सम्परीतः।
तत्रापि लोलां स्त्रियमेका दधानः किं ते प्रियत्वे सुतनु विष्णुरर्हः ॥ ४१ ॥
यः साम्राज्यपदं याति धरणीमण्डलेश्वरः।
अष्टादशद्वीपपतिः स्मरसुन्दरविग्रहः ॥ ४२ ॥
कौतुकी स्त्रीप्रियाचारो वेशालंकारभूषितः।
प्रेमानुरागनिपुणः स ते भर्तृपदोचितः ॥ ४३ ॥
साम्प्रतं ब्रह्मणः सृष्टौ देवासुरमनुष्यकैः।
गन्धर्वैर्ज्योतिषां चक्रैश्चन्द्रसूर्यादिभिस्तथा ॥ ४४ ॥
अहिभिर्भोगशोभाढ्यैर्मणिभूषितमस्तकैः ।
राजन्यैः क्षत्रियश्रेष्ठैर्वर्णैर्विप्रादिभिः पृथक् ॥ ४५ ॥
महती रचिता शोभा तेष्वेकं वृणु कंचन।
वरुणं च वरं प्राप्य सुन्दरं जलदैवतम् ॥ ४६ ॥
रत्नमालाविभूषाढ्यं नित्यं मोदिष्यसे चिरम्।
इन्द्रं वापि वरं प्राप्य सर्वदेवगणेश्वरम् ॥ ४७ ॥
ऐरावते समासीना मेघमण्डलगामिनी।
द्वितीया दामिनीवत्त्वं भविष्यसि महाप्रभा ॥ ४८ ॥
हवींषि श्रोत्रियागारेष्वहर्निशमवाप्स्यसि।
यथा त्वं यास्यसि प्रेम्णा न तथास्य प्रिया शची ॥ ४९ ॥
अग्नेश्चेत्त्वं वधूर्भूत्वा यास्यसि प्रेमपात्रताम्।
तदा स्वाहास्वधातोऽपि श्रेष्ठैव त्वं भविष्यसि ॥ ५० ॥