भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 197, कुल 423 में से
संदर्भ में पढ़ेंपृष्ठ 197
- १८३ -
हा सीते सहजे सितासिततमे साकेतलक्ष्मीपरे-
पूर्णे चिन्मयचित्तचन्द्रकिरणश्रेणीचमत्कारिणी।
दत्तप्रेमरसावलम्बनमहो कान्ते जनं मादृशं-
कामक्रूरकठोरसायकहतिं कृत्वा भृशं मा कुरु ॥ ३५ ॥
गुणवति तावकीने मधुहासविशिष्टमुखेन्दुरुचिप्रसरे-
मधुसमयेऽपराधरहिते प्रणवैकपराजितके रमणे।
वितथमियतमीश्वरि विलम्बमिमं न कुरुष्व कदापि परं-
न सहितिकालशक्तिरतिमात्रवियोगभवं परितापमिमम् ॥ ३६ ॥
इत्थं प्रलयमानस्य तस्य पूर्णमहेशितुः।
कालशक्तिः स्वानुचरी प्रभुं साक्षादुवाच ह ॥ ३७ ॥
कालशक्तिरुवाच
अहं कृष्ण सखी नाम तावकीना गुणोदया।
त्वमिच्छसि यमानन्दं तं साक्षादुपसादये ॥ ३८ ॥
कालशक्तिरहं कृष्णा ज्ञानशक्तिस्तु जानकी।
क्रियाशक्तिः कला नाम प्रेमशक्तिश्च मोदिनी ॥ ३९ ॥
अन्याश्च शक्तयोऽनन्ता योषिद्रूपमुपाश्रिताः।
प्रभुं गुणनिधिं कान्तं भवन्तं पर्युपासते ॥ ४० ॥
सर्वासां रञ्जनं कार्यं प्रभुणा भवता प्रभो।
एतद्धि सौष्ठवं नाथ स्वामिनः स्वामिनीष्वपि ॥ ४१ ॥
इति ब्रुवाणां तां कृष्णं कोटिचन्द्रावलिप्रभाम्।
इन्द्रनीलमणिप्रख्यनीलमेघतनुद्युतिम् ॥ ४२ ॥
ज्योत्स्नायतीं तडिल्लेख्यां स्वर्णकोटितनुप्रभाम्।
सर्वावयवशोभाढ्यां हसन्तीं कामुकी प्रियाम् ॥ ४३ ॥
वीक्ष्य कान्तः स्थितो दृग्भ्यां सद्यः कामविमोहितः।
अविध्यत चलैस्तस्याः कटाक्षैः काममार्गणैः ॥ ४४ ॥
ततस्तयातिकामुक्या समयुज्यत कामुकः।
रन्तुमेकान्ततः स्वैरं सुखैर्निधुवनोद्भवैः ॥ ४५ ॥
कालशक्तिः स्वयं साक्षात् सा तु कृष्णा गुणोदया।
अदृश्यमकरोत्कुञ्जं तस्मिन् कुन्दवने महत् ॥ ४६ ॥
दिव्यं तमः समसृजत् क्रीडास्थानं न्यगूहयत्।
तत्र रेमे तया रामश्चिदानन्दगुणाकरः ॥ ४७ ॥