भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
भुशुण्डि रामायण (काकभुशुण्डि एवं गरुड़ संवाद - पूर्वखण्ड सविस्तार व्याख्या)
Bhusundi Ramayana: Purva Khanda with Commentary
महर्षि भुशुण्डि (सम्पादक: डॉ. भगवतीप्रसाद सिंह) द्वारा
DevanagariHindipublished423 पृष्ठ
पृष्ठ 124, कुल 423 में से
संदर्भ में पढ़ेंपृष्ठ 124
- ११० -
तत्र तद्भाति परमं ब्रह्माक्षरमनुत्तमम् ।
पुरुषोत्तमस्य यद्दिव्यं कीर्तितं पदमुच्चकैः ॥ ३ ॥
स लोकस्तस्य विमलश्चिन्तामणिमयो मही ।
कल्पद्रुमा द्रुमाः सर्वे पूर्णपीयूषकं सरः ॥ ४ ॥
ज्ञानिनां तन्निराकारं निरीहं निर्गुणं तथा ।
तदेव भक्तैः साकारं दृश्यते सगुणं महत् ॥ ५ ॥
तत्र प्रवर्तयामास¹ रामभक्तिमनुत्तमाम् ।
सरय्वाः सलिलं पीत्वा तत्रत्यास्ते महर्षयः ॥ ६ ॥
श्रीरामभक्तिसम्पन्ना बभूवुर्हृष्टचेतसः ।
ततस्तां विरजा देवी प्रोवाच विगतस्मया ॥ ७ ॥
दर्शनेनैव हृष्टात्मा सद्यः प्रेमवती सती ।
विरजोवाच
इह ब्रह्मैव परमं गीयते श्रुतिकोटिभिः ।
ज्ञानगम्यं सदा ज्ञेयं रूक्षवद्भाति तत्सुखम् ॥ ८ ॥
अधुना तु परं प्रेम भवत्या प्रकटीकृतम् ।
श्रीरामचन्द्रविषयं ब्रह्मानन्दाच्छताधिकम् ॥ ९ ॥
सहस्रलक्षकोट्यंशैः स्फुरदभ्यधिकाधिकम् ।
त्वं गुरुः परमास्माकं श्रीरामप्रेमशिक्षणे ॥ १० ॥
सदास्माकं गृहेतिष्ठ ब्रह्माक्षरमहाह्रदे ।
अत्र स्थित्वा ज्ञानवतां मुनीनां ब्रह्मवर्चसाम् ॥ ११ ॥
प्रवर्तय परांभक्तिं रसास्वादैकहेतवे ।
नामी विदन्ति प्रेमाणं परब्रह्मरसोत्तरम् ॥ १२ ॥
व्यर्थमेषां ततो ज्ञानं गणितानन्दभागिनाम् ।
मानुषेभ्योऽधिकानन्दाः सम्राजः शतसंख्यया ॥ १३ ॥
सम्राड्भ्योयक्षगन्धर्वाः कर्मदेवास्ततोऽपि च ।
देवाश्च कर्मदेवेभ्यस्तेभ्य इन्द्रस्तथैव च ॥ १४ ॥
इन्द्राच्छताधिकानन्द आङ्गिरस उदारधीः ।
आङ्गिरसाधिको ब्रह्मा ब्रह्मणो ब्रह्म चाधिकम् ॥ १५ ॥
एषाऽऽनन्दस्य गणना श्रुत्या मीमांसितापुरा ।
तस्मादगणितानन्दं परं ब्रह्म प्रकीर्तितम् ॥ १६ ॥
अक्षरात्परतः स्थानं यत्र श्रीपुरुषोत्तमः ।
परं ब्रह्म तदेवोक्तं साकारं रसरूपधृक् ॥ १७ ॥
१. इतः पूर्वं खण्डितः पाठ.—बडौ. ।